शुरु अत्यन्त करुणामय परम दयालु अल्लाहको नामबाट
१. अल्लाहले सबैको लागि आउने कयामतको पलको उल्लेख गर्नुभयो ।
२. अवश्य आइछाड्ने घट्ना के हो ? यो प्रश्न गरी उहाँले त्यसको महत्वलाई दर्शाउनुभयो ।
३. तपाईंलाई यस घटनाको विषयमा के थाहा छ ?
४. सालिह (अलैहिस्सलाम) को समुदाय समूद र हूद (अलैहिस्सलाम) को समुदाय आदले कयामतलाई नकारे जसले धेरै नै भयावह भएको कारणले मानिसहरूलाई आघात पुर्याउनेछ ।
५. समूदलाई अल्लाहले अति नै चर्को स्वरद्वारा नष्ट पार्नुभयो ।
६. आदलाई अल्लाहले अति नै चिसो र डरलाग्दो आँधीले नष्ट पार्नुभयो ।
७. अल्लाहले त्यस आँधीलाई सात रात र आठ दिनको लागि चलाउनुभयो । त्यसले सबैलाई नष्ट पार्यो । तपाईंले तिनीहरूले आफ्ना घरको भुइँमा दयनीय अवस्थामा पछारिएको देख्नुहुनेछ । मानौं, उनीहरू आफ्नो विनाशपछि जमिनमा फालिएका खजूरका जराहरू जस्ता थिए ।
८. उनीहरूमाथि आएको यातनापछि के तपाईंले उनीहरूमध्ये कसैलाई पनि बचेको देख्नुभयो ?
९. फिर्औनले, ऊभन्दा पहिलेका समुदायहरूले र उल्टो पारेर यातना दिइएका लूत (अलैहिस्सलाम) को समुदायका नगरहरूले शिर्क र अवज्ञा जस्ता नराम्रा आचरण अपनाएका थिए ।
१०. ती सबैले उनीहरूतर्फ पठाइएका रसूलको अवज्ञा गरे र उनलाई झूठो ठहरू गरे । अल्लाहले उनीहरूलाई घोर यातनाले समात्नुभयो जसले उनीहरूलाई नष्ट पार्यो ।
११. वास्तवमा, जब पानीले उचाईको सीमा नाघ्यो, हामीले तपाईंका पुर्खाहरूलाई डुङ्गामा चढायौं जसको निर्माण नूह (अलैहिस्सलाम) ले हाम्रो आदेशले गरे र त्यो तिमीहरूको पनि सवार हुने साधन बन्यो ।
१२. अनि यस डुङ्गालाई र यसको कथालाई काफिरहरूलाई नष्ट पार्ने र मोमिनहरूलाई सुरक्षा प्रदान गर्ने प्रमाण स्वरूप उपदेश बनाइयो र यसलाई कानले सुन्नेहरूको लागि सुरक्षित पार्नेछ ।
१३. जब सूर फुक्ने जिम्मा पाएको फरिश्ताले दोस्रो पटक सूर फुक्नेछ ।
१४. पृथ्वी र पहाडहरूलाई माथि उठाइनेछ अनि सबैलाई एकै पटकमा धुलो पारिनेछ ।
१५. जुन दिन यो सबै हुनेछ त्यो दिन नै कयामतको दिन हुनेछ ।
१६. त्यसदिन फरिश्ताहरूको अवतरणले आकाश चिरिनेछ । आकाश दृढ र कडा भएता पनि त्यसदिन सजिलै भाँचिने हुनेछ ।
१७. फरिश्ताहरू त्यसको किनारामा हुनेछन् । त्यस महान दिन आठ जाना नजिकका फरिश्ताहरूले तपाईंको पालनकर्ताको सिंहासनलाई उठाएका हुनेछन् ।
१८. हे मानिसहरू हो ! त्यसदिन तिमीहरूलाई अल्लाहसमक्ष पेश गरिनेछ । तिमीहरूका रहस्यहरूमध्ये कुनै पनि अल्लाहबाट लुकेको हुनेछैन । बरू अल्लाहलाई सबै कुराहरूको ज्ञान छ ।
१९. जसलाई उसको कर्मपत्र उसको दाहिने हातमा दिइनेछ उसले खुशी र हर्षले भन्नेछः लिऊ, मेरो कर्मपत्र पढ ।
२०. मलाई पुनः जीवित पारिनेछ र बदला दिइनेछ भनी मलाई संसारमा थाहा थियो र विश्वास थियो ।
२१. उसले प्राप्त गर्ने अनन्त अनुग्रहको कारण ऊ सुखद जीवनमा हुनेछ ।
२२. ऊ उच्च र प्रतिष्ठित स्वर्गमा हुनेछ ।
२३. त्यसका फलहरू खानेहरूका लागि धेरै नजिक हुनेछन् ।
२४. उनीहरूको सम्मानमा भनिनेछः खाऊ र पिऊ । त्यहाँ खाना र पिउनाले कुनै नोक्सान गर्दैन । बितेका दिनहरूमा संसारमा तिमीहरूले गरेका असल कार्यहरूको परिणाम स्वरूप यो तिमीहरूलाई दिइएको हो ।
२५. अनि जसलाई उसको कर्मपत्र उसको देब्रे हातमा दिइनेछ, उनीहरूले पछुताएर भन्नेछन्- यदि मैले मेरो कर्मपत्र प्राप्त नगरेको भए हुनेथ्यो किनकि यसमा मलाई यातनाको हकदार बनाउने मेरा दुष्कर्महरूको उल्लेख गरिएको छ ।
२६. यदि मलाई मेरो हिसाबको विषयमा केही पनि थाहा नभएको भए राम्रो हुनेथ्यो ।
२७. यदि मेरो अन्त भएको मृत्यु नै निर्णायक मृत्यु भएको भए र मलाई पुनः जीवित नपारिएको भए राम्रो हुनेथ्यो ।
२८. मेरो सम्पत्तिले मलाई अल्लाहको यातनाबाट रत्ती भर पनि बचाउन सकेन ।
२९. मेरो प्रमाण र मैले भर परेको शक्ति र प्रतिष्ठा हरायो ।
३०. अनि भनिनेछः हे फरिश्ताहरू हो ! उसलाई समात र उसको हातलाई उसको घाँटीको वरिपरि बाँध ।
३१. अनि उसलाई नर्कमा हाल र उसलाई त्यसको गर्मी सहन देऊ ।
३२. त्यसपछि उसलाई सत्तरी हात लामो जञ्जीरमा जकडिदेऊ ।
३३. वास्तवमा, ऊ महान अल्लाहमाथि आस्था राख्दैन थियो ।
३४. अरूलाई गरिबहरूलाई खाना खुवाउन प्रोत्साहित गर्दैनथ्यो ।
३५. कयामतको दिन उसलाई यातनाबाट बचाउने कोही नातेदार हुनेछैन ।
३६. उसले नर्कबासीहरूको शरीरबाट निस्केको तरल पदार्थ मात्र खान पाउनेछ ।
३७. यो खाना पापीहरू र अवज्ञाकारीहरूले मात्र खानेछन् ।
३८. तिमीहरू जे देख्छौ अल्लाहले त्यसको कसम खानुभयो ।
३९. अनि तिमीहरू जे देख्दैनौ अल्लाहले त्यसको कसम खानुभयो ।
४०. वास्तवमा, कुर्आन अल्लाहको वाणी हो । उहाँका प्रतिष्ठित रसूल (सल्लल्लाहु अलैहि व सल्लम) मानिसहरूलाई त्यसको बाचन गरेर सुनाउनुहुन्छ ।
४१. यो कविको कथन होइन किनकि यो कविताको शैलिमा भनिएको छैन । तिमीहरू कमै आस्था राख्छौ ।
४२. अनि यो ज्योतिषीको कथन पनि होइन । ज्योतिषीको कथन कुर्आनभन्दा भिन्दै हुन्छ । तिमीहरू कमै विचार गर्छौ ।
४३. बरू यसलाई सम्पूर्ण सृष्टिको पालनकर्ताको तर्फबाट अवतरण भएको हो ।
४४. यदि हामीले नभनेको कुरा मुहम्मद (सल्लल्लाहु अलैहि व सल्लम) ले स्वयं रचेर ल्याउनुभएको भए ।
४५. हामी उहाँसँग बदला लिने थियौं र उहाँलाई बल र शक्तिका साथ समात्ने थियौं ।
४६. अनि हामी उहाँको मुटुको नसा नै काट्ने थियौं ।
४७. अनि तिमीहरूमध्ये कसैले पनि हामीलाई रोक्न सक्दैन । उहाँले हाम्रो नाम लगाएर आफ्नो मनबाट कुनै कुरा रच्नु असम्भव छ ।
४८. वास्तवमा, आफ्नो पालनकर्ताको कुराहरूको अनुसरण गरेर र उहाँले रोक्नुभएको कुराबाट बचेर उहाँसँग डराउनेहरूको लागि यो कुर्आन एउटा उपदेश हो ।
४९. वास्तवमा, तिमीहरूमध्ये यस कुर्आनलाई झूठो ठहर गर्नेहरूलाई अल्लाह राम्ररी जान्नुहुन्छ ।
५०. कयामतको दिन कुर्आनलाई झूठो ठहर गर्नु सबैभन्दा ठूलो पश्चातापको कारण हुनेछ ।
५१. वास्तवमा, कुर्आन अति विश्वसनीय सत्य हो र यो अल्लाहको तर्फबाट आएको कुरामा कुनै शंका छैन ।
५२. हे रसूल (सल्लल्लाहु अलैहि व सल्लम) ! आफ्नो पालनकर्तालाई शोभा दिने तरिकाले उहाँको पवित्रता बयान गर्नुहोस् र आफ्नो महान पालनकर्ताको नामको बखान गर्नुहोस् ।
टिप्पणियाँ
एक टिप्पणी भेजें