७८) सूरह अन्-नबा

शुरु अत्यन्त करुणामय परम दयालु अल्लाहको नामबाट 

१. यी मुश्रिकहरूलाई अल्लाहले आफ्नो रसूल (सल्लल्लाहु अलैहि व सल्लम) पठाएपछि यिनीहरू कुन विषयमा सोध्दैछन् ?!

२. उनीहरू आपसमा एउटा ठूलो सूचनाको विषयमा सोध्दैछन् । त्यो उनीहरूका रसूल (सल्लल्लाहु अलैहि व सल्लम) माथि अवतरित यो कुर्आन हो जसमा पुनः जीवित पार्ने विषयमा जानकारी समावेश गरिएको छ ।

३. यो कुर्आन जसको गुण जस्तै जादू, कविता, भविष्यवाणी र पूर्वजहरूको कथा भनेर वर्णन गर्ने विषयमा यिनीहरू विरोध गर्छन् ।

४. उनीहरूले सोँचे जस्तो कदापि होइन । कुर्आनलाई झूठो ठहर गर्ने दुष्प्रयास गर्नेहरूले चाँडै नै आफ्नो झूठको परिणाम थाहा पाउनेछन् ।

५. यो पक्कै पनि हुनेछ ।

६. के हामीले उनीहरूको लागि धर्तीलाई सम्म बनाएर त्यसलाई बस्ने योग्य बनाएका छैनौं ?

७. हामीले यसलाई हल्लिनबाट जोगाउनको लागि पर्वतहरूलाई किला सरह राखेका छौं ।

८. हे मानिसहरू ! हामीले तिमीहरूलाई पुरूष र महिला गरी छुट्टा छुट्टै लिङ्गमा सृष्टि गरेका छौं ।

९. हामीले तिमीहरूका लागि निद्रालाई कामबाट विश्राम लिने साधन बनाएका छौं ।

१०. हामीले रातलाई त्यसको अन्धकारले तिमीहरूका लागि लुगा जस्तै छोप्ने बनाएका छौं जसरी तिमीहरू लुगाले आफ्ना गुप्ताङ्गहरू छोप्ने गर्छौ ।

११. हामीले दिनलाई परिश्रम गर्ने र जीविका खोज्ने समय बनायौं ।

१२. अनि हामीले तिमीहरूमाथि सातवटा बलिया आकाशहरू बनाएका छौं ।

१३. हामीले सूर्यलाई धेरै चम्किलो र उज्ज्वल दीप बनायौं ।

१४. पानीले भरेको बादलबाट हामीले धेरै पानी परायौं ।

१५. त्यसद्वारा अन्न र वनस्पति उमार्नका लागि ।

१६. जसद्वारा हामी बगैंचाहरू बनाउँछौं जुन अतिव्यापी हाँगाहरू भएका रूखहरूले भरिएका हुन्छन् । (जब अल्लाहले आफ्नो क्षमताको प्रमाण स्वरूप यी कृपाहरूको उल्लेख गर्नुभयो तब लगत्तै उहाँले पुनः जीवित पार्ने र कयामतको उल्लेख गर्नुभयो किनकि जुन शक्ति यी कृपाहरूको सृष्टि गर्ने क्षमता राख्नुहुन्छ उहाँ मृतकलाई जीवित पार्ने र हिसाब लिने सामर्थ्य पनि राख्नुहुन्छ । उहाँले भन्नुभयोः)

१७. वास्तवमा जुन दिन सृष्टिहरूबीच न्याय गरिनेछ त्यो एक निश्चित अवधिसँग बाँधिएको छ जुन परिवर्तन हुनेछैन ।

१८. जुन दिन फरिश्ताले दोस्रो पटक बिगुल फुक्नेछ त्यस दिन, हे मानिसहरू, तिमीहरू समूह समूहमा आउनेछौ ।

१९. अनि आकाशलाई खोलिनेछ र खुलेका ढोकाहरू सरह त्यसमा खाली ठाउँ बन्नेछ ।

२०. अनि पहाडहरू दृष्टिभ्रम सरह छरिएको धुलो हुनेछन् ।

२१. वास्तवमा नर्क सतर्क र पर्खाइमा बसेको छ ।

२२. यो अत्याचारीहरूका लागि फर्कने ठाउँ हो ।

२३. जसमा तिनीहरू अनन्त कालका लागि रहनेछन् ।

२४. त्यहाँ नर्कको आगोलाई चिसो बनाउनका लागि तिनीहरूले चिसो हावा र आनन्दित हुनको लागि पेय पाउने छैनन् ।

२५. तिनीहरूले पिउनको लागि तातो पानी र नर्कबासीहरूको पीप पाउनेछन् ।

२६. तिनीहरूको कुफ्र र पथभ्रष्टताको पूर्ण बदलाको रूपमा ।

२७. अल्लाहले आखिरतमा लिनुहुने हिसाबको विषयमा उनीहरू संसारमा डराउदैन थिए किनकि उनीहरू पुनः जीवित हुने कुरामा आस्था राख्दैनन् । यदि आस्था राखेका भए त्यसबाट डराउने थिए, अल्लाहमाथि आस्था राख्ने थिए र सत्कर्न गर्ने थिए ।

२८. अनि हाम्रा रसूल (सल्लल्लाहु अलैहि व सल्लम) माथि अवतरित आयतहरूलाई झूठो छहर गरे ।

२९. हामीले उनीहरूको कर्महरू गन्ती गरेर सुरक्षित राखेका छौं । त्यो सबै उनीहरूको कर्म पुस्तिकामा लेखिएको छ ।

३०. हे अत्याचारीहरू ! सदा रहने यातनाको स्वाद चाख । तिमीहरूको यातनामा हामी बृद्धि गर्नेछौं ।

३१. वास्तवमा आफ्ना पालनकर्ताको आदेशको अनुसरण गरेर र उहाँले मनाही गर्नुभएका कुराहरूबाट बचेर उहाँको डर राख्नेहरू सफलताको ठाउँ हुनेछ जहाँ उनीहरूले चाहेका कुराहरू पाउनेछन् र त्यो ठाउँ स्वर्ग हो ।

३२. बगैचाहरू र अंगुरहरू ।

३३. समान उमेरकी युवतीहरू ।

३४. मदिराले भरेका प्याला ।

३५. उनीहरूले स्वर्गमा नराम्रा कुराहरू र झूठ सुन्ने छैनन् । अनि आपसमा झूठो बोल्ने छैनन् ।

३६. अल्लाहले प्रदान गरेका हरेक कुराहरू उहाँको उपकार हो उहाँको तर्फबाट पर्याप्त उदारता हो ।

३७. आकाशहरू, पृथ्वी र ती दुई बीचमा रहेका कुराहरूका पालनकर्ता, संसार र आखिरतमा दया गर्ने । अनि पृथ्वी वा आकाशमा रहेकाहरू उहाँको आदेश बिना प्रश्न गर्न सक्दैनन् ।

३८. त्यस दिन जिब्रील र अन्य फरिश्ताहरू लाममा उभिनेछन् । उनीहरूले कसैको लागि पनि दयावानको अनुमति बिना सिफारिस गर्ने छैनन् । उनीहरूले एकेश्वरबादका कुरा जस्ता कुराहरू गर्नेछन् ।

३९. जुन दिनको विषयमा तिमीहरूलाई भनियो त्यसको आगमणमा कुनै शंका छैन । त्यस दिन जो अल्लाहको यातनाबाट जोगिन चाहन्छ उसले आफ्नो पालनकर्तालाई खुशी पार्ने सत्कर्म गरेर त्यसलाई सुनिश्चित गरोस् ।

४०. हे मानिसहरू ! वास्तवमा हामीले तिमीहरूलाई आउनै लागेको एउटा कठोर यातनाको चेतावनी दियौं । त्यस दिन मान्छेले संसारमा गरेको कर्मलाई देख्नेछ । अनि यातनाबाट बच्ने आशाले काफिरले भन्नेछः कयामतको दिन जनावरहरूलाई माटो होऊ भनी आदेश दिइएको बेला बरू म पनि माटो भएको भए हुन्थ्यो ।