शुरू अत्यन्त करुणामय परम दयालु अल्लाहको नामबाट
१. लामो समयसम्म मनुष्यको कुनै चिन्ह थिएन र ऊ उल्लेखनीय पनि थिएन ।
२. हामीले मनुष्यलाई पुरूष र महिलाको मिश्रित वीर्यबाट सृष्टि गर्यौं । हामी उसलाई जिम्मेवारी वहन गराएर उसको परिक्षा लिन्छौं । हामीले उसलाई दिएको धार्मिक जिम्मेवारी वहन गर्नका निम्ति उसलाई सुन्ने र देख्ने शक्ति प्रदान गर्यौं ।
३. हामीले उसलाई हाम्रा रसूलहरूको मुखबाट मार्गदर्शनलाई प्रष्ट पार्यौं । तसर्थ यसको सहयोगले ऊसमक्ष पथभ्रष्टता उजागर भयो । त्यसपश्चात ऊ कि त मार्गदर्शनको अनुसरण गरी एउटा मोमिन भक्त हुनेछ जो अल्लाहको प्रशंसा गर्नेछ वा ऊ पथभ्रष्ट भई एउटा काफिर भक्त हुनेछ जो अल्लाहका निशानीहरूलाई इन्कार गर्नेछ ।
जब अल्लाहले मार्गदर्शन प्राप्त गर्ने व्यक्ति र पथभ्रष्ट व्यक्तिलाई प्रष्ट पार्नुभयो तब उहाँले उनीहरूको बदला उल्लेख गर्नुभयो र भन्नुभयोः
४. अल्लाह र उहाँका रसूलहरूलाई नकार्नेहरूका लागि हामीले जञ्जीर तयार पारेका छौं जसले तिनीहरू आगोमा तानिने छन्, नेलहरू जसले उनीहरू बाँधिनेछन्, र दन्कँदो आगो तयार पारेका छौं ।
५. वास्तवमा, कयामतको दिन अल्लाहका आज्ञाकारी मोमिनहरू मदिरा / उत्तम पेय पदार्थ पिउनेछन् जसलाई कपूर मिसाई सुगन्धित बनाइएको हुनेछ ।
६. आज्ञाकारी भक्तहरूका लागि तयार पारिएको यो पेय सजीलै पुग्न सक्ने र कहिल्यै समाप्त नहुने स्रोतबाट आउँछ । जुन अल्लाहका भक्तहरूलाई पिलाइनेछ । उनीहरू जता चाहन्छन् त्यसलाई बगाउछन् र लिएर जान्छन् ।
७. त्यसबाट पानी पिउने भक्तहरूका विशेषताहरू अनुसार उनीहरू आफूमाथि अनिवार्य गरेका उपासनालाई पूरा गर्छन् । उनीहरू कयामतको दिनदेखि डराउँछन् जसको सङ्कट चारैतिर फैलिएको हुनेछ ।
८. उनीहरू आफैलाई खानाको आवश्यकता र चाहना भए तापनि त्यसलाई गरिब, टुहुरो र बन्दी जस्ता अभावग्रस्तहरूलाई खुवाउँछन् ।
९. उनीहरू केवल अल्लाहलाई प्रसन्न पार्नको लागि यिनीहरूलाई खुवाउँछन् भन्ने कुरा आफ्नै मनमा लुकाएर राख्छन् । तसर्थ उनीहरू यिनीहरूलाई खुवाए बापत कुनै प्रकारको बदला र प्रशंसाको चाहना राख्दैनन् ।
१०. हामीलाई हाम्रा पालनकर्ताको त्यसदिनको यातनाको डर लागेको छ जुन दिन कठिनाइ र निर्दयताको कारणले पापीहरूको अनुहार दुखी हुनेछ ।
११. अल्लाहले आफ्नो दयादृष्टिले त्यस महान दिनको दुष्टताबाट उनीहरूलाई बचाउनु हुनेछन् । अनि उनीहरूको सम्मानमा उनीहरूको अनुहारमा यश एवं प्रकाश र उनीहरूको मनमा प्रसन्नता प्रदान गर्नु हुनेछन् ।
१२. उनीहरूले अल्लाहको आज्ञापलन गर्न, उहाँको इक्षा / उहाँले लेख्नुभएको भाग्यलाई स्वीकार्न, उहाँको अवज्ञा गर्नबाट बच्नको निम्ति गरेका धैर्य धारणको कारण अल्लाहले उनीहरूलाई प्रतिफल स्वरूप स्वर्ग प्रदान गर्नुहुनेछ जसमा उनीहरू अनुग्रहबाट लाभान्वित हुनेछन् र लगाउनका लागि रेशम प्रदान गर्नुहुनेछ ।
१३. त्यहाँ उनीहरू सजाइएका खाट / ओछ्यानमा अडेस लगाएका हुनेछन् । उनीहरू यस स्वर्गमा कुनै सूर्य देख्नेछैनन् जसको प्रकाशले उनीहरूलाई सताओस् र धेरै चिसो पनि हुनेछैन । बरू उनीहरू ताप र चिसो बिना सधैं छायाँमा हुनेछन् ।
१४. त्यसको छायाँ उनीहरूको छेउमा हुनेछ र त्यसका फलहरू जसले चाहन्छ उसको लागि उपलब्ध हुनेछन् । उसले सजिलै र आरामसँग खानेछ । ती फलहरू पल्टिने, बस्ने र उभिने सबैको पहुँचमा हुनेछन् ।
१५. जब उनीहरू पिउने इच्छा राख्नेछन् तब उनीहरूसमक्ष सेवकहरू चाँदीका भाँडाहरू र सफा रङ्गका प्यालाहरू लिएर घुमिरहेका हुनेछन् ।
१६. त्यो शीशा जस्तो स्पष्ट रङ्गको चाँदीको भाँडामा हुनेछ । उनीहरूले चाहेको मात्रा पश्किइनेछ । त्यसमा केही थपिने वा घाटाइने छैन ।
१७. यी सम्मानित व्यक्तिहरूलाई पिउनका लागि अदुवा मिसाइएको मदिराको प्याला दिइनेछ ।
१८. उनीहरू स्वर्गमा सल्सबील नाम गरेको मूलबाट पिउनेछन् ।
१९. स्वर्गमा उनीहरूको सेवामा सदा युवा नै रहने सेवकहरू घुमिरहनेछन् । यदि तपाईंले उनीहरूलाई देख्नुभयो भने, उनीहरूको अनुहारको चमक, रङ्गको सौन्दर्य, उनीहरूको संख्या र उनीहरूको भिन्नताले तपाईंलाई तितर बितर मोतीहरूको सम्झना गराउँनेछ ।
२०. यदि तपाईंले स्वर्गमा देख्नुभयो भने, तपाईंले त्यहाँ अवर्णनीय / वर्णन गर्न नसकिने अनुग्रह र ठूलो अतुलनीय राज्य देख्नुहुनेछ ।
२१. उनीहरूले पातलो र बाक्लो रेशमको उत्कृष्ट हरियो पोशाक र चाँदीको बाला लगाउनेछन् । अनि अल्लाहले उनीहरूलाई हानि नगर्ने पेय पदार्थ प्रदान गर्नुहुनेछ ।
२२. अनि उनीहरूलाई सम्मान गरिँदै भनिनेछः वास्तवमा, तिमीहरूलाई प्रदान गरिएका यी अनुग्रहहरू तिमीहरूले गरेका सत्कर्मका बदला हुन् । अल्लाहको नजरमा तिमीहरूको सत्कर्म स्वीकार्य थिए ।
२३. हे रसूल (सल्लल्लाहु अलैहि व सल्लम) ! हामीले नै तपाईंमाथि कुर्आनलाई क्रमसँग अवतरण गर्यौं । हामीले एकै पटकमा पूरा अवतरण गरेका छैनौं ।
२४. अल्लाहले भाग्य र शरीअतको विषयमा दिनुभएको आदेशप्रति धैर्य धारण गर्नुहोस् । अनि त्यस पापीको अनुसरण नगर्नुहोस् जो आफ्नो पापको निम्तो दिन्छ र त्यस काफिरको अनुसरण नगर्नुहोस् जो कुफ्रको निम्तो दिन्छ ।
२५. दिनको प्ररम्भमा फज्र सलाह पढेर र त्यसको अन्तिममा जुहर र अस्र सलाह पढेर आफ्नो पालनकर्तालाई स्मरण गर्नुहोस् ।
२६. रातको समयका दुईवटा सलाहहरू अर्थात मग्रिब र ईशाका सलाहहरूमा उहाँको स्मरण गर्नुहोस् र त्यसपश्चात तहज्जुद पढ्नुहोस् ।
२७. वास्तवमा, यी मुश्रिकहरू संसारको जीवनलाई मन पराउँछन् र त्यसको चाहना राख्छन् । अनि कयामतको दिनलाई पछाडि छोड्छन्, वास्तवमा त्यस दिनको दुःख र कष्टको कारण त्यो दिन धेरै कठीन रहेको छ ।
२८. हामीले उनीहरूको सृष्टि गरेका छौं र उनीहरूका अंगहरू, हड्डीहरू, आदिलाई बलियो बनाएर उनीहरूको सृष्टिलाई सुदृढ पारेका छौं । यदि हामी उनीहरूलाई नष्ट गरी उनीहरू जस्तै अरूलाई प्रतिस्थापन गर्न चाह्यौं भने हामी उनीहरूलाई नष्ट गरेर प्रतिस्थापन गर्नेछौं ।
२९. वास्तवमा, यो सूरह उपदेश र स्मरण हो । तसर्थ जो आफ्नो पालनकर्तालाई प्रसन्न पार्न चाहन्छ उसले यसलाई अपनाओस् ।
३०. अल्लाहले नचाहेसम्म तिमीहरूले उहाँलाई प्रसन्न पार्ने बाटो अपनाउन सक्नेछैनौ । निर्णय पूर्ण रूपले उहाँकै हातमा छ । अल्लाहका भक्तहरूका लागि के उपयोगी छ के छैन भन्ने कुराको ज्ञान उहाँलाई छ । उहाँसँग आफ्नो सृष्टि, भाग्य र शरीअतको विषयमा बौद्धिक ज्ञान छ / अल्लाह आफ्नो सृष्टि, भाग्य र शरीअतको विषयमा तत्वदर्शी हुनुहुन्छ ।
३१. उहाँ आफ्ना भक्तहरूमध्ये जसमाथि चाहनुहुन्छ दया गर्नुहुन्छ र उनीहरूलाई आस्था र सत्कर्ममा सहयोग गर्नुहुन्छ । अनि आफ्नो लागि कुफ्र र पाप रोजेर आफूमाथि अत्याचार गर्नेहरूको लागि उहाँले आखिरतमा पीडादायी यातना तयार पारेर राख्नुभएको छ र त्यो नर्कको यातना हो ।
टिप्पणियाँ
एक टिप्पणी भेजें