शुरू अत्यन्त करुणामय परम दयालु अल्लाहको नामबाट
१. हे रसूल (सल्लल्लाहु अलैहि व सल्लम) ! अल्लाहले तपाईंका लागि वैध राख्नुभएको कुरा अर्थात तपाईंकी पत्नीहरूले ईर्ष्या गरेको कारणले उनीहरूलाई प्रसन्न पार्नका निम्ति किन तपाईंले आफ्नी दासी मर्यमसँग रमाइलो गर्न किन आवैध गर्नुभयो ? अल्लाह त तपाईंको लागि क्षमाशील र दयावान हुनुहुन्छ ।
२. तिमीहरूले कसमभन्दा राम्रो विकल्प पाएको वा कसम पूरा गर्न नसक्ने अवस्थामा अल्लाहले तिमीहरूलाई प्रायश्चित गरी कसम भङ्ग गर्न वैध गर्नुभएको छ । अल्लाह तिमीहरूका सहयोगी हुनुहुन्छ । उहाँलाई तिमीहरूको अवस्थाको र तिमीहरूलाई फाइदा दिने कुराको विषयमा थाहा छ । अनि उहाँ आफ्नो कानुन र भाग्य लेख्नमा तत्वदर्शी हुनुहुन्छ ।
३. याद गर, जब नबी (सल्लल्लाहु अलैहि व सल्लम) ले आफ्नी दासी मर्यमको नजिक नजाने कुरा विशेष गरी हफ्सालाई बताउनुभयो । जब हफ्साले आइशालाई त्यस कुराको जानकारी गराइन् तब अल्लाहले आफ्नो नबीलाई त्यो खबर फैलिएको विषयमा सूचित गर्नुभयो । उहाँले हफ्शालाई गाली गर्नुभयो अनि उनले भनेका कुराहरूमध्येबाट केही कुरा उहाँले भन्नुभयो र बाकीँ भन्नुभएन । अनि उनले सोधेः तपाईंलाई कसले भन्यो ? उहाँले भन्नुभयोः सबै कुराको ज्ञाता र हरेक गोप्य सूचना दिनेले मलाई भन्यो ।
४. तिमी दुबैजनाले पश्चाताप गर्नु अनिवार्य रहेको छ किनकि तिमीहरूको हृदय त्यस कुराको प्रेममा फस्यो जसलाई अल्लाहका रसूल (सल्लल्लाहु अलैहि व सल्लम) ले मन पराउनुहुन्न अर्थात उहाँकी दासीबाट टाढा बस्नु र उसलाई आफूमाथि अवैध गर्नु । यदि तिमीहरूले उहाँविरूद्ध यो काम गरी राख्यौ भने जानी राख अल्लाह उहाँको संरक्षक र सहयोगी हुनुहुन्छ । त्यसरी नै जिब्रील र सत्कर्मी मोमिनहरू उहाँका संरक्षक र सहयोगी हुन् । अनि अल्लाहको सहयोगपश्चात उहाँलाई चोट पुर्याउनेहरूविरूद्ध फरिश्ताहरू संरक्षक र सहयोगी हुन् ।
५. यदि नबी (सल्लल्लाहु अलैहि व सल्लम) ले तिमीहरूलाई तलाक दिनुभयो भने आशा छ, उहाँका पालनकर्ताले उहाँलाई तिमीहरूको बदलामा तिमीहरूभन्दा बढी राम्री पत्नीहरू प्रदान गर्नुहुनेछ जो उहाँका आदेश मान्ने, उहाँमाथि र उहाँका रसूलमाथि आस्था राख्ने, अल्लाहका आज्ञाकारी, आफ्ना पापहरूको लागि पश्चाताप गर्ने, आफ्ना पालनकर्ताको उपासना गर्ने, सौमको पालना गर्ने, विवाहिता र उहाँबाहेक अरूसँग विवाह नभएकी स्त्रीहरू हुनेछिन् । तर उहाँले उनीहरूलाई तलाक दिनुभएन ।
६. हे अल्लाहमाथि आस्था राख्नेहरू र उहाँका आदेशहरूको पालना गर्नेहरू हो ! आफूलाई आफ्ना परिवारका सदस्यहरूलाई त्यस महान आगोबाट बचाऊ जसलाई मानिहरू र ढुङ्गाहरूद्वारा बालिनेछ । त्यस आगोमाथि त्यहाँ प्रवेश गर्नेहरूका लागि कठोर र प्रबल फरिश्ताहरू नियुक्त छन् । उनीहरू अल्लाहले दिनुभएको आदेशको अवज्ञा गर्दैनन् । उहाँले दिनुभएको आदेशको पालना उनीहरू सुस्ती र आनाकानी नगरी गर्छन् ।
७. अनि कयामतको दिन काफिरहरूलाई भनिनेछः हे कुफ्र गर्नेहरू हो ! तिमीहरूले गरेको कुफ्र र पापको लागि आज बहाना नबनाऊ । तिमीहरूको बहाना मान्य हुनेछैन । तिमीहरूले संसारमा अल्लाहलाई नकार्ने र उहाँका रसूलहरूलाई झूठो ठहर गर्ने गरेको कार्यको तिमीहरूलाई आज बदला दिइनेछ ।
८. हे अल्लाहमाथि आस्था राख्ने र उहाँका आदेशहरूको पालना गर्नेहरू हो ! अल्लाहसमक्ष आफ्ना पापहरूको साँचो पश्चाताप गर । आशा छ, तिमीहरूका पालनकर्ताले तिमीहरूका पापहरूलाई क्षमा गर्नुहुनेछ र तिमीहरूलाई कयामतको दिन स्वर्गमा प्रवेश गराउनुहुनेछ जसका महलहरूको तलतिरबाट नदीहरू बगिरहेका हुनेछन् । त्यस दिन अल्लाहले नबी (सल्लल्लाहु अलैहि व सल्लम) लाई र उहाँसँग भएका मोमिनहरूलाई नर्कमा हाली अपमानित गर्नुहुनेछैन । त्यस बाटोमा उनीहरूको अगाडि र दायाँतर्फ उनीहरूको प्रकाश जानेछ । उनीहरूले भन्नेछन्- हे हाम्रा पालनकर्ता ! हाम्रो प्रकाशलाई हाम्रोलागि पूर्ण गरिदिनुहोस् जसले गर्दा हामी स्वर्गमा प्रवेश गर्नसकौं । हामी मुनाफिकहरूसरह नहोऔं जसले बाटोमा आफ्नो प्रकाशलाई निभाउँनेछन् । हाम्रोलागि हाम्रा पापहरूलाई क्षमा गर्नुहोस् किनकि तपाईं सम्पूर्ण कुराहरूको सामर्थ्य राख्नुहुन्छ । हाम्रा प्रकाशलाई पूर्ण रूप दिन र हाम्रा पापहरूलाई क्षमा गर्न तपाईं असक्षम हुनुहुन्न ।
९. हे रसूल (सल्लल्लाहु अलैहि व सल्लम) ! काफिरहरूसँग तरवारको साथ र मुनाफिकहरूसँग मौखिक रूपमा र सजाय दिएर युद्ध गर । अनि उनीहरूले तिमीहरूको डर नराखेसम्म उनीहरूसँग कडा व्यवहार गर । कयामतको दिन उनीहरूले नर्कमा बसोबास अपनाउनेछन् । उनीहरूको बासस्थान अति नराम्रो बासस्थान हो जहाँ उनीहरू फर्केर जानेछन् ।
१०. अल्लाहलाई र उहाँका रसूलहरूलाई नकार्नेहरूका लागि, मोमिनहरूसँगको सम्बन्धले उनीहरूलाई कुनै फाइदा पुर्याउने छैन भन्ने कुरालाई स्पष्ट पार्दै, अल्लाहका नबीहरूमध्येका दुईजना नबीहरू अर्थात नूह र लूत (अलैहिमस्सलाम) की पत्नीहरूको उदाहरण अल्लाहले प्रस्तुत गर्नुभयो । ती दुबै हाम्रा दुईजना असल भक्तहरूकी पत्नी थिइन् । तर दुबैजनाले अल्लाहको मार्गबाट रोकेर र आफ्ना पतिका समुदायका काफिरहरूको सहयोग गरी दुबैलाई धोका दिइन् । यी दुई असल भक्तहरूकी पत्नी भएर पनि उनीहरूलाई कुनै फाइदा प्राप्त भएन । यी दुबैलाई भनियोः नर्कमा प्रवेश हुने सम्पूर्ण काफिर र मुनाफिकहरूको साथमा तिमीहरू पनि त्यहाँ जाऊ ।
११. अल्लाहमाथि र उहाँका रसूलहरूमाथि आस्था राख्नेहरू हरेक अवस्थामा सीधा मार्गमा अडिग रहने हो भने उनीहरूलाई काफिरहरूसँगको सम्बन्धले कुनै हानी गर्नेछैन र उनीहरूमाथि त्यसको कुनै प्रभाव पर्नेछैन भन्ने कुरालाई प्रष्ट पार्नका लागि अल्लाहले उनीहरूलाई फिर्औनकी पत्नीको उदाहरण प्रस्तुत गर्नुभयो । उनले भनेः हे मेरा पालनकर्ता ! स्वर्गमा मेरो लागि एउटा घर बनाउनुहोस् र मलाई फिर्औनको क्रुरता, शक्ति र उसका नराम्रा कर्महरूबाट मलाई सुरक्षित राख्नुहोस् । अनि उसको तानाशाही र अत्याचारमा उसको अनुसरण गरी आफूमाथि अत्याचार गर्नेहरूबाट सुरक्षित राख्नुहोस् ।
१२. अल्लाहमाथि र उहाँका रसूलहरूमाथि आस्था राख्नेहरूलाई अल्लाहले इम्रानकी छोरी मर्यमको उदाहरण प्रस्तुत गर्नुभयो । उनले व्यभिचार गर्नबाट आफ्नो गुप्ताङ्गलाई सुरक्षित राखिन् । अनि अल्लाहले जिब्रीललाई त्यसमा आत्मा फुक्ने आदेश दिनुभयो । अल्लाहले लेख्नुभएको भाग्यले बुवा बिना ईसा बिन मर्यम (अलैहिस्सलाम) को गर्भ रहयो । उनले अल्लाहका शरीअतहरू र उहाँका रसूलहरूमाथि अवतरित किताबहरूको पुष्टि गरिन् र अल्लाहका आदेशहरूको पालना गरी र उहाँले मनाही गर्नुभएका कुराहरूबाट बचेर उहाँका आज्ञाकारीहरूमध्येकी भइन् ।
टिप्पणियाँ
एक टिप्पणी भेजें