६२- सूरह अल्-जुमुअह्

शुरू अत्यन्त करुणामय परम दयालु अल्लाहको नामबाट

१. आकाशहरू र पृथ्वीमा रहेका सम्पूर्ण सृष्टिहरू अल्लाहको गुणगान गर्छन र असुहाउँदो कमिकमजोरीबाट उहाँको पवित्रताको वर्णन गर्छन् । उहाँ राज्यका एक्लो राजा हुनुहुन्छ । उहाँ हरेक प्रकारका कमिकमजोरीबाट पवित्र हुनुहुन्छ । उहाँ अति शक्तिशाली हुनुहुन्छ र उहाँलाई कसैले पराजित गर्न सक्दैन । उहाँ आफ्ना सृष्टिमा, कानुनमा र भाग्य लेख्नमा तत्वदर्शी हुनुहुन्छ ।

२. उहाँले नै पढ्न र लेख्न नजान्नेहरू अरबीहरूमा उनीहरूमध्येबाट नै रसूल पठाउनुभयो । जो उनीहरूलाई आफूमाथि अवतरित आयतहरूको पाठ गरेर सुनाउनुहुन्छ । उहाँ उनीहरूलाई कुफ्र र नराम्रो आचरणबाट पवित्र पार्नुहुन्छ । उनीहरूलाई कुर्आन र सुन्नतको ज्ञान दिनुहुन्छ किनकि उहाँ रसूल भएर आउनुअघि उनीहरू प्रष्ट सत्यताबाट पथभ्रष्ट थिए । उनीहरू मूर्तिहरूको पूजा गर्दथे, रगत बगाउँथे र आफन्तसँग सम्बन्ध तोड्थे ।

३. यस रसूललाई उहाँले अरू अरबीहरू र उनीहरूबाहेक अरूहरूको लागि पनि रसूल बनाएर पठाउनुभएको छ जो अहिले आएका छैनन् । उनीहरू पछि आउनेछन् । उहाँ अति शक्तिशाली हुनुहुन्छ र उहाँलाई कसैले पराजित गर्न सक्दैन । उहाँ आफ्ना सृष्टिमा, कानुनमा र भाग्य लेख्नमा तत्वदर्शी हुनुहुन्छ ।

४. रसूल (सल्लल्लाहु अलैहि व सल्लम) लाई अरबीहरू र अरूहरूको लागि पठाइनु अल्लाहको वरदान हो जुन उहाँ जसलाई चाहनुहुन्छ प्रदान गर्नुहुन्छ । अल्लाह महान कृपाका मालिक हुनुहुन्छ र उहाँको महान कृपा भनेको यस समुदायको रसूललाई सम्पूर्ण मानवजातिको लागि पठाउनु हो ।

जब अल्लाहले रसूल (सल्लल्लाहु अलैहि व सल्लम) लाई पठाएर र कुर्आन अवतरण गरेर गर्नुभएको कृपाको उल्लेख गर्नुभयो तब उहाँले मूसा (अलैहिस्सलाम) का केही अनुयायीहरूले तौरातको अनुसरण गर्नबाट विमुख भएको कुरा पनि उल्लेख गर्नुभयो । उनीहरूको अनुसरण नगर्नका लागि उहाँले यस समुदायको निम्ति चेतावनीको रूपमा यसलाई उल्लेख गर्नुभयो । उहाँले भन्नुभयोः

५. यहूदी समुदाय त्यो समुदाय हो जसलाई तौरातको अनुसरणको जिम्मेवारी दिइएको थियो तर उनीहरूले त्यसको अनुसरण गरेनन् । यिनीहरूको उदाहरण त्यस गधा सरह हो जसले ठूला किताबहरूको भार बोकेको हुन्छ तर उसले के बोकेको छ भन्ने कुराको ज्ञान उसलाई हुँदैनः के यी किताबहरू हुन् र ? अल्लाहका आयतहरूलाई झूठो ठहर गर्नेहरूको उदाहरण निकै घृणित रहेको छ । अल्लाह सत्यतासम्म पुग्न सक्ने क्षमता अत्याचारी मानिसहरूलाई प्रदान गर्नुहुन्न ।

६. हे रसूल (सल्लल्लाहु अलैहि व सल्लम), भन्नुहोस्- हे विकृति पश्चात पनि यहूदी नै रहेकाहरू हो ! यदि अल्लाहले मानिसहरूलाई छाडी तिमीहरूलाई प्रियपात्र बनाउनुभएको छ भन्ने तिमीहरूलाई लाग्छ भने मृत्युको कल्पना गर । तसर्थ अल्लाहले तिमीहरूलाई जुन प्रतिष्ठाको लागि चुन्नुभएको छ त्यो दिनको लागि उहाँले हतार गर्नुहुनेछ । यदि तिमीहरूको सोँच अनुसार तिमीहरू अल्लाहको प्रियपात्र भएको दावीमा सच्चा छौ भने यसो गर ।

७. उनीहरूले कहिल्यै मृत्युको चाहना राख्नेछैनन् । बरू उनीहरूले गरेका कुफ्र, पाप, अत्याचार, तौरातमा विकृति र परिवर्तनका कारण उनीहरू संसारमा सदा रहने चाहना राख्नेछन् । अल्लाहलाई अत्याचारीहरूको ज्ञान छ । उनीहरूको कुनैपनि क्रियाकलाप उहाँबाट लुकेको छैन र उनीहरूलाई त्यसै अनुसार बदला दिइनेछ ।

८. हे रसूल (सल्लल्लाहु अलैहि व सल्लम) ! यी यहूदीहरूलाई भन्नुहोस्- वास्तवमा, तिमीहरू जुन मृत्युदेखि भाग्छौ त्यसको सामना ढीलो वा चाँडो तिमीहरूले गर्नुपर्ने नै छ । अनि कयामतको दिन अदृश्य र दृश्यका ज्ञाता अल्लाहतिर तिमीहरू फर्केर जानेछौ । त्यसबाट उहाँबाट कुनैपनि कुरा लुकेको छैन । अनि तिमीहरूले संसारमा गर्ने गरेका क्रियाकलापहरूको विषयमा तिमीहरूलाई भन्नुहुनेछ र त्यसै अनुसार तिमीहरूलाई बदला दिनुहुनेछ ।

९. हे अल्लाहमाथि आस्था राख्ने र उहाँका आदेशहरूको अनुसरण गर्नेहरू हो ! शुक्रबारको दिन जब इमाम खुत्बाको लागि मिम्बरमा चढ्छ र मुअज्जिन सलाहको लागि अजान दिन्छ तब तिमीहरू खुत्बा सुन्न र सलाह पढ्न मस्जिद जाऊ र व्यापार गर्न छोड नत्र यसले तिमीहरूलाई अल्लाहको अनुसरणबाट रोक्नेछ । हे मोमिनहरू हो ! जुमाको सलाहको अजानपश्चात तिमीहरूलाई मस्जिद जान र व्यापार छोड्न दिइएको आदेश तिमीहरूको लागि उत्तम रहेको छ, यदि तिमीहरूलाई यो थाहा छ भने । तसर्थ अल्लाहले तिमीहरूलाई दिनुभएका आदेशको पालना गर ।

१०. जब तिमीहरू जुमाको सलाह पढिसक्छौ तब धर्तीमा हलाल जीविकाको खोजी र आफ्ना आवश्यकता पूर्तिका लागि फैल । हलाल जीविका र हलाल नाफाको क्रममा अल्लाहको कृपा माग र जीविकाको खोजिको समयमा धेरै भन्दा धेरै अल्लाहको स्मरण गर । अनि तिमीहरूले जीविकाको खोजिमा लाग्ने कामले तिमीहरूलाई अल्लाहको स्मरण नबिर्साओस् । आशा छ, तिमीहरूले मन पराउने कुरा पाउने छौ र डर राख्ने कुराहरूबाट बच्न सक्नेछौ ।

११. जब केही मुस्लिमहरू कुनै व्यापार वा मनोरन्जनको सामाग्री देख्छन् उनीहरू छरिएर त्यतातिर जान्छन् र हे रसूल (सल्लल्लाहु अलैहि व सल्लम), तपाईंलाई मिम्बरमा उभिएको अवस्थामा छोड्छन् । हे रसूल (सल्लल्लाहु अलैहि व सल्लम) ! भन्नुहोस्- त्यो व्यापार र मनोरन्जन जसतिर तिमीहरू जान्छौ त्यसभन्दा उत्तम सत्कर्मको प्रतिदान रहेको छ जुन अल्लाहसँग छ । अल्लाह सर्वोत्तम जीविका प्रदानकर्ता हुनुहुन्छ ।