शुरू अत्यन्त करुणामय परम दयालु अल्लाहको नामबाट
१. हे नबी (सल्लल्लाहु अलैहि व सल्लम) ! यदि तपाईं वा तपाईंको समुदायबाट कसैले पनि आफ्नी पत्नीलाई तलाक दिन चाहन्छ भने उसको पहिलो इद्दतको लागि तलाक देऊ अर्थात उसको पतिले उसँग संभोग नगरेको पवित्रताको समयमा तलाक दिनु । अनि इद्दतको गन्ती राख । तिमीहरूले आफ्ना पत्नीहरूलाई फिर्ता लिन चाहेको खण्डमा उनीहरूलाई फिर्ता लिन सम्भव हुनेछ । अल्लाहका आदेशहरूको पालना गरेर र उहाँले मनाही गर्नुभएका कुराहरूलाई त्यागेर अल्लाहको भय राख । इद्दतको अवधि समाप्त नभएसम्म उनीहरू बसेको घरबाट उनीहरूलाई ननिकाल र स्वयं उनीहरू पनि ननिस्किउन् । तर उनीहरूले व्यभिचार जस्ता खुल्ला अश्लिल कार्य गरेको खण्डमा निकाल्नु बेग्लै कुरा हो । यी नियमहरू अल्लाहका सीमा हुन् जुन उहाँले आफ्ना भक्तहरूका लागि निर्धान गर्नुभएको हो । जसले अल्लाहका सीमाहरूको उल्लङ्घन गर्छ उसले आफूमाथि अत्याचार गर्छ किनकि उसले आफ्ना पालनकर्ताको उल्लङ्घन गरी स्वयंलाई विनाशको स्रोतसम्म पुर्यायो । हे तलाक दिने व्यक्ति ! तिमीलाई थाहा छैन, हुन सक्छ अल्लाहले त्यस तलाकपश्चात कुनै बाटो निकाल्नुहुनेछ जसको तिमीहरूलाई आशा थिएन र तिमीहरूले उनीहरूलाई फिर्ता लिनेछौ ।
२. अनि जब उनीहरू आफ्नो इद्दतको अन्तमा पुग्छन् कि त उनीहरूलाई आफ्नो चाहनाले र राम्रो तरिकाले फिर्ता लिऊ वा उनीहरूको इद्दत पूरा हुन्जेल उनीहरूलाई छोड । परिणाम स्वरूप उनीहरू आफ्ना मामिलाहरूको माल्किन हुनेछन् साथै उनीहरूका अधिकारका कुराहरू उनीहरूलाई देऊ । तिमीहरूले उनीहरूलाई फिर्ता लिने वा फर्काउने सोँच बनाएपश्चात आफ्नो मानिसहरूमध्ये दुईजना निसाफ गर्नेलाई विवाद समाधान गर्नका निम्ति साक्षी बनाऊ । हे साक्षी बसेकाहरू हो ! अल्लाहको प्रसन्नता प्राप्तिका लागि साक्षी देऊ । यी नियमहरूको उल्लेख गर्नु अल्लाहमाथि र कयामतका दिनमाथि आस्था राख्नेले उपदेश ग्रहण गर्नको निम्ति हो किनकि ऊ नै उपदेश र चेतावनीबाट फाइदा प्राप्त गर्छ । तसर्थ जो अल्लाहले दिनुभएको आदेशको पालना गरी र उहाँले मनाही गर्नुभएको कुराहरूबाट बची उहाँको भय राख्नेछ उसलाई प्रत्येक कष्ट र बाधाबाट बच्नको निम्ति निकास निकाल्नुहुनेछ ।
३. उहाँ आशा नगरिएको र अकल्पनीय ठाउँबाट सहयोग र जीविका प्रदान गर्नुहुन्छ । अनि जो आफ्ना मामिलाहरूमा अल्लाहमाथि निर्भर हुन्छ उसको लागि उहाँ पर्याप्त हुनुहुन्छ । वास्तवमा, अल्लाह आफ्नो फैसलालाई लागु गर्नुहुन्छ । उहाँलाई कुनै कुराको लागि बाध्य पार्न सकिँदैन र उहाँबाट कुनै कुरा उम्कन सक्दैन । अल्लाहले हरेक वस्तुको समाप्तिको लागि समय सीमा निर्धारित गर्नुभएको छ । दुःखको समयसीमा छ र समृद्धिको पनि समयसीमा छ । मानिस यी दुईमध्ये कुनै अवस्थामा पनि सदा रहँदैन ।
४. बुढेसकालको कारणले रजस्वलाबाट मुक्त भइसकेकी तलाक पाएकी महिलाहरूको इद्दतको विषयमा यदि तिमीहरूलाई शंका छ भने जानी राख उनीहरूको इद्दत तीन महिना हो । त्यसरी नै बाल्यकालको कारणले रजस्वलाको समय नभएकीहरूको इद्दत तीन महिना हो । अनि गर्भवती महिलाहरूको तलाकको र पतिको मृत्युपश्चातको इद्दत उनीहरूले बच्चा जन्माउनु हो । जो अल्लाहको आदेशहरूको पालना गरी र उहाँले मनाही गर्नुभएको कुराहरूबाट बची उहाँको डर राख्छ उसका मामिलालाई अल्लाहले सहज बनाउनुहुनेछ र उसलाई हरेक कठिन अवस्थामा राहत प्रदान गर्नुहुनेछ ।
५. हे मोमिनहरू हो ! तलाक दिने, फिर्ता लिने र इद्दतका उल्लेख गरिएका नियमहरू अल्लाहको आदेश हो जस अनुसार तिमीहरूले कार्य गर्न सक भनी उहाँले तिमीहरूका लागि अवतरण गर्नुभएको हो । जसले अल्लाहका आदेशहरूको पालना गरी र उहाँले मनाही गर्नुभएका कुराहरूबाट बची उहाँको भय राख्यो अल्लाहले उसले गरेका पापहरूलाई क्षमा गर्नुहुनेछ र आखिरतमा महान प्रतिदान दिनुहुनेछ अर्थात उसले स्वर्गमा प्रवेश पाउनेछ र कहिले समाप्त नहुने अनुग्रह प्राप्त गर्नेछ ।
जब अल्लाहले तलाक र त्यो फिर्ता लिने विषयमा नियमहरूको उल्लेख गर्नुभयो तब उहाँले खुवाई र बसाईको नियम उल्लेख गर्नुभयो । उहाँले भन्नुभयोः
६. हे पतिहरू हो ! उनीहरूलाई आफ्नो हैसियत अनुसार तिमीहरू बस्ने ठाउँमा नै राख । अल्लाहले तिमीहरूलाई अरू कार्यहरूको लागि बाध्य पार्नुभएको छैन । खुवाई र बसाई र कुराहरूको नाममा उनीहरूको जीवनलाई गाह्रो बनाउनका लागि उनीहरूलाई नसताऊ । यदि तलाक पाएकी महिलाहरू गर्भवती छन् भने उनीहरूले बच्चा नजन्माएसम्म उनीहरूमाथि खर्च गर । यदि उनीहरू तिमीहरूका सन्तानलाई स्तनपान गराउँछन् भने उनीहरूलाई स्तनपान गराए बापत पारिश्रमिक देऊ । अनि पारिश्रमिकको विषयमा आपसमा राम्रो तरिकाले सरसल्लाह गर । पारिश्रमिकको विषयमा पत्नीले चाहेको जति दिन पतिले कन्जुसी गर्छ तर उसले आफूले चाहेको पारिश्रमिक नै लिन चाहन्छे भने बुवाले आफ्नो सन्तानलाई स्तनपान गराउनका निम्ति अरूलाई राख्न सक्छ ।
७. सम्पन्न व्यक्तिले आफूले तलाक दिएको महिला र बच्चामाथि आफ्नो सामर्थ्य अनुसार खर्च गर्नुपर्दछ । अनि जसलाई सिमित जीविका प्रदान गरिएको छ उसले अल्लाहले दिनुभएकोमध्येबाट खर्च गरोस् । अल्लाह कसैलाई पनि उहाँले दिनुभएको भन्दा बढी खर्च गर्न बाध्य गर्नुहुन्न, उहाँलाई अधिक जिम्मेवारी दिनुहुन्न र उसले सहन सक्नेभन्दा बढी जिम्मेवारी पनि दिनुहुन्न । अल्लाह उसलाई चाँडै नै सिमित र कठिन अवस्थापछि सहजता र प्रशस्तता प्रदान गर्नुहुनेछ ।
जब अल्लाहले पूरै नियमहरूको उल्लेख गर्नुभयो तब उहाँले ती नियमहरूबाट विमुख नहुन चेतावनी दिनुभयो र त्यसको नराम्रो परिणामलाई प्रष्ट पार्नुभयो । अनि उहाँले भन्नुभयोः
८. कतिपय नगरहरूले आफ्ना पालनकर्ताको आदेश र उहाँका रसूलहरूको आदेशलाई अस्वीकार गरे । परिणाम स्वरूप हामीले उनीहरूका नराम्रा कार्यहरूको कडा हिसाब लियौं र उनीहरूलाई संसारमा र आखिरतमा डरलाग्दो दण्ड दियौं ।
९. तसर्थ उनीहरूले आफ्ना नराम्रा कार्यहरूको यातना भोगे । उनीहरूले संसारमा र आखिरतमा घाटा बेहोर्नु पर्ने भयो ।
१०. अल्लाहले उनीहरूका लागि कडा यातना तयार पार्नुभएको छ । हे अल्लाहका आदेशहरूको पालना गरी र उहाँले मनाही गर्नुभएका कुराहरूबाट बची उहाँमाथि आस्था राख्ने र उहाँका रसूल (सल्लल्लाहु अलैहि व सल्लम) माथि आस्था राख्ने बुद्धिमानहरू हो ! अल्लाहको भय राख नत्र उनीहरूमाथि आएको आपत तिमीहरूमाथि आउन सक्छ । अल्लाहले तिमीहरूको लागि एउटा चेतावनी प्रकट गर्नुभएको छ जसले उहाँको आज्ञापालन नगर्दाको दुर्भाग्यपूर्ण परिणामहरू र उहाँको आज्ञापालन गर्दा राम्रा परिणामहरूको सम्झना गराउँछ ।
११. यो चेतावनी भनेको रसूल हो जो तिमीहरूसमक्ष अल्लाहका स्पष्ट पार्ने आयतहरूको पाठ गर्नुहुन्छ जसमा कुनै भ्रम छैन । आशा छ, अल्लाहमाथि आस्था राख्नेहरू, उहाँका रसूल (सल्लल्लाहु अलैहि व सल्लम) लाई पुष्टि गर्नेहरू र सत्कर्म गर्नेहरूलाई पथभ्रष्टताको अन्धकारबाट निकालेर मार्गदर्शनको प्रकाशतिर लानुहुनेछ । जो अल्लाहमाथि आस्था राख्छ र सत्कर्म गर्छ अल्लाहले उसलाई बगैंचाहरूमा प्रवेश गराउनुहुनेछ जसका महलहरू र रूखहरूको तलतिरबाट नहरहरू बगिरहेका हुनेछन् । जसमा उनीहरू सदाका लागि रहनेछन् । अल्लाहले उसलाई स्वर्गमा प्रवेश गराएर एउटा राम्रो प्रबन्ध मिलाउनुभएको छ जसको अनुग्रह कहिल्यै समाप्त हुनेछैन ।
१२. अल्लाहले नै सातवटा आकाशहरूको सृष्टि गर्नुभयो र सातवटा आकाशहरू जस्तै सातवटा पृथ्वीहरूको सृष्टि गर्नुभयो । उहाँका दुबै कानुनहरू, प्रकृतिको कानुन र धर्मको कानुन यी दुबैको बीचमा अवतरण हुन्छन् । आशा छ, अल्लाह हरेक कुराको सामर्थ्य राख्नुहुन्छ भन्ने कुरा तिमीहरूले थाहा पाउनेछौ । उहाँलाई कसैले पनि बाध्य पार्न सक्दैन । उहाँले हरेक कुरालाई आफ्नो ज्ञानले घेर्नुभएको छ र आकाशहरू र पृथ्वीमा उहाँबाट कुनै पनि कुरा लुकेको छैन ।
टिप्पणियाँ
एक टिप्पणी भेजें