६३- अल्-मुनाफिकून

शुरू अत्यन्त करुणामय परम दयालु अल्लाहको नामबाट

१. हे रसूल (सल्लल्लाहु अलैहि व सल्लम) ! जब तपाईंको सभामा मुनाफिकहरू आउँछन् जो इस्लामको प्रदर्शन गर्छन् र कुफ्रलाई लुकाएर राख्नछन् र भन्छन्- तपाईं साँच्चै नै अल्लाहका रसूल हुनुहुन्छ भनी हामी गवाही दिन्छौं । तपाईं साँच्चै नै उहाँका रसूल हुनुहुन्छ भन्ने कुरा अल्लाहलाई थाहा छ । तर उनीहरूले भित्री मानबाट तपाईं उहाँका रसूल हुनुहुन्छ भनी दिएको गवाहीको दाबीमा मुनाफिकहरू झूठा हुन् भन्ने कुराको गवाही अल्लाह दिनुहुन्छ ।

२. आस्थालाई प्रमाणित गर्नको लागि उनीहरूले जुन कसम खएका छन् त्यसको प्रयोग उनीहरूले हत्या र कैद हुनबाट बच्नको लागि कवचको रूपमा गरेका छन् । उनीहरूले मानिसहरूमा शंका र भ्रम उत्पन्न गरी उनीहरूलाई आस्थाबाट टाढा गरे । वास्तवमा, कपट र झूठा कसमले गर्दा उनीहरू अति घृणित हुन् ।

३. उनीहरूले आस्थाको ढोंग गरेको कारणले यसो भएको हो । आस्थाले उनीहरूको हृदयमा प्रवेश गरेको छैन । अनि उनीहरूले गोप्य रूपले कुफ्र गरे । तसर्थ उनीहरूको कुफ्रले गर्दा उनीहरूको हृदयमा उहाँले सिल लगाइदिनुभयो । अब त्यसमा आस्था प्रवेश गर्नेछैन । त्यस सिलको कारणले उनीहरूको भलाइ र मार्गदर्शन कुन केमा छ भन्ने कुरा उनीहरू बुझ्न सकेका छैनन् ।

४. हे हेर्ने व्यक्ति ! तिमीले उनीहरूलाई हेर्दा उनीहरूको उपस्थिति र रूपरङ्ग तिमीलाई मन पर्छ किनकि उनीहरू सुन्दर र सम्पन्न छन् । जब उनीहरू बोल्छन् तिमी उनीहरूको कुरा सुन्छौ किनकि उनीहरू कुशल वक्ता हुन् । हे रसूल (सल्लल्लाहु अलैहि व सल्लम) ! मानौं उनीहरू तपाईंको सभामा पर्खालमा टाँसिएका काठका तख्ता हुन् । उनीहरू केही पनि बुझ्दैनन् र जान्दैनन् । उनीहरू भित्रदेखि कायर भएको हुनाले हरेक कुरालाई आफैमाथि प्रहार गरिएको हो भनी ठान्छन् । उनीहरू साँच्चिकै शत्रु हुन् । तसर्थ, हे रसूल (सल्लल्लाहु अलैहि व सल्लम) ! उनीहरूबाट बचेर बस्नुहोस् । उनीहरूले तपाईंका गोप्य कुराहरू फैलाउनेछन् र तपाईंविरूद्ध षड्यन्त्र गर्नेछन् भन्ने आशंका छ । उनीहरूमाथि अल्लाहको श्राप होस् ! स्पष्ट प्रमाणहरू भएता पनि उनीहरू आस्थाबाट फर्केर कहाँ गइरहेका छन् ?!

५. जब यी मुनाफिकहरूलाई भनिन्छः अल्लाहका रसूल (सल्लल्लाहु अलैहि व सल्लम) समक्ष आऊ । उहाँले तिमीहरूको पापहरूको क्षमा याचना अल्लाहसित गर्नुहुनेछ । उनीहरूले खिल्ली उडाउँदै टाउको हल्लाए । उनीहरूलाई दिइएको आदेशबाट उनीहरू विमुख भएको तपाईं देख्नुहुन्छ किनकि उनीहरू सत्यलाई स्वीकार्न घमण्ड गर्छन् र त्यसप्रति समर्पित हुँदैनन् ।

६. हे रसूल (सल्लल्लाहु अलैहि व सल्लम) ! तपाईंले उनीहरूका पापहरूको क्षमा याचना गर्नु र नगर्नु समान रहेको छ । अल्लाहले उनीहरूका पाप क्षमा गर्नुहुनेछैन । वास्तवमा, अल्लाहको अनुसरण त्याग्नेहरू र पाप गरिराख्नेहरूलाई उहाँ कहिल्यै मार्गदर्शन प्रदान गर्नुहुन्न ।

७. उनीहरू नै भन्छन्- अल्लाहका रसूल (सल्लल्लाहु अलैहि व सल्लम) सँग भएका गरिबहरू र मदीना वरिपरी बस्ने गाउँलेहरूले त्यसलाई नछोडेसम्म उनीहरूमाथि खर्च नगर । आकाशहरूका र पृथ्वीका खजानाहरू केवल अल्लाहका हुन् । त्यो उहाँ आफ्ना भक्तहरूमध्ये जसलाई चाहनुहुन्छ दिनुहुन्छ । तर जीविकाको खजाना उहाँको हातमा छ भन्ने कुरा मुनाफिकहरूलाई थाहा छैन ।

८. उनीहरूको अगुवा अब्दुल्लाह बिन उबैले भन्योः यदि हामी मदीना फर्केर गयौं भने त्यहाँबाट प्रतिष्ठितहरू अर्थात म र मेरो समुदायले अति तुच्छहरू अर्थात मुहम्मद (सल्लल्लाहु अलैहि व सल्लम) र उहाँका साथीहरूलाई निकाल्नेछन् । प्रतिष्ठा त केवल अल्लाहको, रसूलको र मोमिनहरूको हो । अब्दुल्लाह बिन उबै र उसका साथीहरूको होइन । तर प्रतिष्ठा केवल अल्लाह, उहाँका रसूल र मोमिनहरूको लागि हो भन्ने कुरा मुनाफिकहरूलाई थाहा छैन ।

जब अल्लाहको बाटोबाट रोक्नको लागि मुनाफिकहरूले खर्च गर्न कन्जुसी गर्नुको उत्सुकताको उल्लेख गर्नुभयो । उहाँले मोमिनहरूलाई यसबाट रोक्नुभयो र उनीहरूलाई अल्लाहको मार्गमा खर्च गर्ने आदेश दिनुभयो । उहाँले भन्नुभयोः

९. हे अल्लाहमाथि आस्था राख्ने र उहाँको आदेशको पालना गर्नेहरू हो ! तिमीहरूको धन र सन्तानहरूले तिमीहरूलाई सलाह वा अन्य अनिवार्य कार्यहरूबाट नरोकोस् । जसलाई उसको धन र सन्तानले अल्लाहले अनिवार्य गर्नुभएको सलाह वा अन्य कार्यहरूबाट रोक्यो उनीहरू साँच्चै नै घाटा बेहोर्नेहरू हुन् जसले कयामतको दिन आफ्नो र आफ्नो परिवारको घाटा बेहोर्नेछन् ।

१०. अल्लाहले तिमीहरूलाई प्रदान गर्नुभएको धनबाट मृत्यु हुनु अघि नै खर्च गर । अनि उसले आफ्नो पालनकर्तालाई भन्ने छः हे मेरा पालनकर्ता ! मलाई थोरै समय प्रदान गर्नुहोस् । जसले गर्दा म आफ्नो धनबाट अल्लाहको मार्गमा केही खर्च गर्न सकौं र अल्लाहका त्यसता असल भक्तहरूमध्येको हुन सकौं जसले आफ्ना कार्यहरूलाई सुधारेका छन् ।

११. तर कुनै प्राणीको मृत्युको समय आएपछि र उसको उमेर समाप्त भएपछि अल्लाहले उसलाई समय प्रदान गर्नुहुनेछैन । तिमीहरू जे गर्छौ त्यसको ज्ञान अल्लाहलाई छ । तिमीहरूको कुनैपनि कार्य उहाँबाट लुकेको छैन र त्यसै अनुसार तिमीहरूलाई बदला दिनुहुनेछ । यदि कार्यहरू राम्रा छन् भने बदला राम्रो हुनेछ र कार्यहरू नराम्रा छन् भने बदला नराम्रो हुनेछ ।