शुरू अत्यन्त करुणामय परम दयालु अल्लाहको नामबाट
१. हे रसूल (सल्लल्लाहु अलैहि व सल्लम) ! के तपाईंसमक्ष आखिरतको कथा आईपुग्यो जसले मानिसहरूलाई भयभीत पार्नेछ ?!
२. कयामतको दिन मानिसहरू दुखी हुनेछन् वा खुशी । दुखी हुनेहरूको अनुहार अपमानित र झुकेको हुनेछ ।
३. उनीहरू थकित, सिक्रीले बाँधिएका हुनेछन् जसद्वारा उनीहरूलाई घिसारिनेछ र हतकडीले बाँधिएका हुनेछन् ।
४. ती अनुहारहरू दन्केको आगोमा प्रवेश गर्नेछन् र त्यसको ताप भोग्नेछन् ।
५. उनीहरूलाई उम्लँदो पानीको स्रोतले पानी दिइनेछ ।
६. उनीहरूले अति नराम्रा खानेकुरा र शिब्रिक नामक अति सडेका बोटबिरूवाहरू खानेछन् । अनि यो सुख्खा हुँदा विषालु हुन्छ ।
७. यसले खानेलाई मोटाउँदैन र उसको भोक पनि मेटिदैन ।
८. त्यसदिन खुशी हुनेहरूको अनुहारले प्राप्त गरेका अनुकम्पाका कारण उनीहरू अनुकम्पाले भरिएको, आनन्दित र खुशी हुनेछन् ।
९. यो उनीहरूले संसारमा खुशी खुशी गरेका सत्कर्मका कारण हुनेछ । अनि उनीहरूको सत्कर्मको पुण्य सुरक्षित र कैंयौ गुणा बढेको हुनेछ ।
१०. उनीहरू उच्च र प्रतिष्ठित स्वर्गमा हुनेछन् ।
११. तपाईंले स्वर्गमा झूठा र बेकारका शब्दहरू सुन्नुहुन्न, अवैध कुराहरू त परै जाओस् ।
१२. यस स्वर्गमा बगिरहेको पानीका स्रोतहरू हुनेछन् जुन उनीहरू जसरी चाहन्छन् प्रयोग गर्छन् ।
१३. त्यहाँ उच्च ओछ्यानहरू हुनेछन् ।
१४. पिउनको लागि तयार पेय पदार्थ हुनेछ ।
१५. अनि एक पछि अर्को गरी सिरानीहरू लगाइएका हुनेछन् ।
१६. जताततै गलैंचाहरू हुनेछन् । (जब अल्लाहले आखिरतमा हुने दुखी हुनेहरू र खुशी हुनेहरूको विभिन्न अवस्थाहरूको उल्लेख गर्नुभयो तब उहाँले ती काफिरहरूको ध्यानाकर्षण गर्नुभयो जसले उनीहरूलाई सृष्टिकर्ताको क्षमता र उहाँका सृष्टिहरूको असल चरित्र देखाउँदछ किनकि त्यसले आस्थालाई प्रमाणित गर्छ । जस कारण उनीहरू स्वर्गमा प्रवेश गर्न सकुन् र खुशी हुन सकुन् । अनि उहाँले भन्नुभयोः)
१७. अल्लाहले उँटलाई कसरी सृष्टि गर्नुभयो र त्यसलाई आदमका सन्तानका लागि
खटाउनुभयो भनी के यिनीहरू सोँच्दैनन् ?!
१८. अल्लाहले आकाशलाई कसरी उच्च पारेर उठाउनुभयो अनि त्यसलाई सुरक्षित कौसी
बनाउनुभयो र त्यो उनीहरूमाथि खस्दैन भनी के यिनीहरू सोँच्दैनन् ?!
१९. उहाँले पहाडहरूलाई कसरी धर्तीमा जमाउनुभयो र त्यसको सहयोगले धर्तीलाई
हल्लिनबाट रोक्नुभयो भनी यिनीहरू सोँच्दैनन् ?!
२०. उहाँले धर्तीलाई फैलाउनुभयो र त्यसलाई मानिसहरूलाई बस्नको लागि योग्य बनाउनुभएको
कुरालाई यिनीहरू सोँच्दैनन् ?! (जब अल्लाहले उनीहरूलाई उहाँको शक्तिको प्रमाणहरूमाथि ध्यान दिन आह्वान गर्नुभयो,
उहाँले आफ्ना रसूल (सल्लल्लाहु अलैहि व सल्लम) को ध्यानाकर्षण गर्नुभयो । उहाँले भन्नुभयोः )
२१. हे रसूल (सल्लल्लाहु अलैहि व सल्लम) ! उनीहरूलाई उपदेश दिनुहोस् र अल्लाहको यातनासँग डराउनुहोस् किनकि तपाईं केवल चेतावनी दिने हुनुहुन्छ । उनीहरूलाई चेतावनी दिनुबाहेक अन्य विषयमा तपाईंलाई सोधिने छैन । उनीहरूलाई आस्था अपनाउन सहज बनाउने काम मात्र अल्लाहको हो ।
२२. तपाईंलाई उनीहरूमाथि कुनै अधिकार छैन र तपाईं उनीहरूलाई आस्था अपनाउन बाध्य पार्न सक्नुहुन्न ।
२३. तर जसले उहाँमाथि आस्था राख्न अस्वीकार गर्दछ र अल्लाह र उहाँको रसूल (सल्लल्लाहु अलैहि व सल्लम) लाई मान्दैन ।
२४ कयामतको दिन अल्लाहले उनीहरूलाई सदाका लागि नर्कमा प्रवेश गराई ठूलो यातना दिनुहुनेछ ।
२५. केवल हामीतिर उनीहरू मृत्युपश्चात फर्केर आउनेछन् ।
२६. अनि केवल हामी नै उनीहरूको कर्महरूको हिसाब लिनेछौं । तपाईं र तपाईंबाहेक अरू कसैको यो जिम्मेवारी होइन ।
टिप्पणियाँ
एक टिप्पणी भेजें